生活小小日記

幾經波折，今日終於攞到新眼鏡啦！ 話說舊眼鏡已經戴左成七年幾啦，凝媽於是帶我去「 眼鏡88 」配左副新眼鏡做禮物，多謝呀！ 副新眼鏡係農曆新年之前配的，可惜，年廿七第一次攞的時候，個鏡框有少少花左，同埋左邊粒螺絲上唔埋口，開頭無發現，於是戴左一日，年廿八就攞返去維修，要等到農曆新年後先至整好。 年初九整好啦，第二次去攞新眼鏡。點知，今次個鏡框左右兩粒螺絲都上唔埋口，職員試過拆左塊鏡片再屈個鏡框，跟位都係上唔埋粒螺絲，咁好明顯係塊鏡片同個鏡框唔夾啦，又要攞返去工場再執下啦。 最後，今日終於有新眼鏡啦！ 多謝凝媽的生日禮物！

今日送左曉凝去返學，就去飲早茶，然後就入去 迪士尼樂園 玩啦。 因為曉凝返左學，所以主力係玩曉凝平時唔會玩的遊戲（森林河流之旅）同唔會睇的表演（米奇幻想曲、獅子王慶典等）。 今日最主要都係為左睇賀年的「虎虎生福」表演。 「迎福跳跳鼓」 「龍騰鼓舞迎福陣」 「吉祥醒獅賀新歲」 最後，畫左一幅跳跳虎同睇完「迪士尼巡遊表演」，玩到四點鐘就走左啦。 夜晚，梗係返屋企同曉凝一齊食飯同食蛋糕啦!

今日又去左「瑞華行」送牛迎虎開倉，又買多左四個點頭公仔同一架 My Melody 收銀機俾曉凝。 點頭公仔（ Unazukin ），買左黃色、紅色、藍色同綠色，個公仔聽到你講野就會識得點頭同拎頭，好好玩，貨版價 $10 一個，超抵呀！ 玩餐廳又好，玩超級市場又好，曉凝最鐘意就係扮收銀員，My Melody 收銀機真係啱晒，特價 $150。

今日係 7-11 見到隻 Wii 手掣賣$25.9，咁平？ 原來係糖，牌子係 Au'some ，同真的 Wii 手掣一模一樣，淨係大細有唔同，拑個 B 掣重有糖彈出離，好好玩。最啱就係俾小朋友拎住，好似自己打緊機咁。

虎年初三 曉凝今日好番少少，不過天氣好寒冷，得十度咋，都係留番係屋企，無出街。 樹式。

虎年初二 今朝，天氣寒冷，公公婆婆過來青衣飲茶，點知曉凝好肚痛，無胃口又無精神。飲茶時候，全程瞓係我身邊。 飲完茶，就一齊去大舅父屋企拜年，曉凝無咁肚痛，表姐就教曉凝玩雙子公主遊戲機。 跟住，就到曉凝屋企拜年，曉凝就同表姐一齊玩Wii Fit Plus，好好玩呀！一家大細都啱玩！ 夜晚，曉凝發燒，又係無咩胃口，又發忟憎，好難應付呀。 重有，就係個廁所突然間塞左，好彩樓下間 日本城 有開門，即刻落去 日本城 買左個廁所泵，足足泵左成十幾廿分鐘，終於通番。

虎年初一 今日一朝早就去左公公婆婆屋企拜年同食早餐，有年糕、蘿蔔糕、馬碲糕、油角同牛肉粥，好豐富呀！ 公公婆婆今年買的桃花同大桔，好靚呀！ 食飽飽，就同表姐一齊玩Q版「金魚、龍蝦、膏蟹」，係用瓜子玩，好得意又好健康。 因為曉凝有咳，所以今日淨係准食兩粒糖果咋。下午，曉凝就返屋企瞓晏覺，要多休息。夜晚，等曉凝同姐姐兩個瞓左覺，就出左去 稻香 宵夜打邊爐。每年初一， 稻香 重會每人派一封利是添。

祝大家 身體健康！ 心想事成！ 萬事勝意！ 東成西就！ 大吉大利！ 步步高陞！ 學業進步！ 恭喜發財！

今晚去左花墟買花，好多人呀，同行年宵一樣。今晚得十三度咋，重有少少微雨添，又好凍呀！ 行左大半個花墟，買左百合花、兩枝富貴子（有好多紅色一粒粒）同一束紫色襯花，再係「 繽紛 」買左一個高身正方型花樽。 凝媽今晚插左一盆好靚的年花，名為「大紅大紫」。 我就加長個名做「花開富貴，大紅大紫」。

今次「瑞華行」送牛迎虎開倉，買左一個化裝組合同一部養雞仔機俾曉凝。 Hello Kitty 化裝組合，有一塊鏡、一個髮夾、一對耳環、一支唇膏同一條頸鍊連粉盒，$45。 「他媽哥池」養雞仔機5.5版本，重送多一張閃閃珠貼紙，都係$30。