生活小小日記

今日一早就去左沙田食飯同行街。因為無食早餐，好肚餓，一到沙田就即刻去 Pokka Cafe 食飯啦！ Pokka 最好食的鐵板牛肉，有300g，有飯，有麵鼓湯，重跟咖啡或茶，又好食又飽肚。 好好食的鐵板午餐A，有豬排、牛柳同兩條蟹柳，一樣有飯、有麵鼓湯，重跟咖啡或茶同甜品。 曉凝都係食佢最鍾意的凍烏冬同香味飯團。 食飽飽，凝媽就自己去行街街，曉凝就跟我周圍行同去玩具反斗城玩下啦。 行到三點幾鐘，就搭火車出旺角啦。出到旺角就收到表姐送的父親節咭，好開心呀！ 夜晚六點就去泉章居食飯，未開飯，兩表姐妹當然係掛住打機啦。 今晚的餸菜好大碟好豐富，食到好飽呀！

好開心呀！今日收到曉凝送的父親節禮物。 係一條紅色呔，好靚呀！ 入面有個大心心。 個心心仲係立體架。 除左張咭外，仲有隻杯添，個盒就畫左好多 Cinnamon 係度架。

今日下著雨，天氣清涼，要帶曉凝去健康院做「學前兒童視力普查」，約左兩點四十五分做檢查，我們兩點三十三分已經到達，等左幾分鐘，就開始驗眼啦。 首先，叔叔問曉凝睇野有無問題，跟住曉凝竟然答話：「好矇呀！」，點解曉凝會亂答架？我就唯有補答話：「平時都無聽佢咁講話睇野矇喎。」跟住，叔叔就叫曉凝望住支筆，檢查有無斜視。然後，就坐係前面問曉凝見唔見到紙上的大英文字係咩，曉凝全部答中。 做完簡單測試，就俾左一幅太陽眼鏡（真係圖中個幅）曉凝帶住，首先遮住左眼，叔叔今次就坐到幾遠，再問曉凝見唔見到紙上的小英文字係咩，曉凝全部答中。之後，再遮住右眼，再問一次，曉凝都全部答中。最後，用左個好似電筒的鎚仔照下兩隻眼，就完成檢查啦，叔叔話曉凝好叻，視力正常。 完成視力檢查後，再等多一陣，就輪到曉凝去磅重同度高啦，體重17.7公斤，身高108厘米。 完成磅重同度高後，又等左一輪就見姑娘啦。姑娘問左「平時邊個照顧小朋友呀？」「小朋友有無咩問題呀？」「老師對小朋友有咩評價呀？」等問題，又問左曉凝「重有無用奶樽同尿片呀？」曉凝就自己答話用杯同無用尿片，姑娘重讚曉凝講野好清楚呢。姑娘重話曉凝的高度係一百個人裏面都高過九十幾人咁多，咁曉凝真係好高啦喎。 見完姑娘，約三點十五分走得，我就完成左今日的任務啦。

無錢買真的 iMac，唯有用 VMWare Workstation 裝左個 Mac OS 來玩下，不過我部電腦唔夠快，所以個 Mac OS 速度真係好慢，按一個掣都要等幾秒先有反應。對 Mac OS 有興趣的話，不妨裝一個來玩下。

房入面個部窗口式分體冷氣機已經用左五年，今個星期開始漏水，重要漏入屋裏面，好麻煩呢！ 前兩日自己開左部機來通喉，用支飲管吹左幾下，清左少少汚積，跟左兩晚都無滴水啦。 以為自己咁勁整好左啦，點知琴晚又開始漏水，重要不停咁漏，越漏越多添！ 今日終於搵左冷氣師傅上來通喉同洗冷氣，因為係分體式冷氣機原故，所以唔可以拆落來清洗。咁即係要係房入面洗啦，咁會唔會成間房濕晒架？師傅話唔會，唯有信佢啦。師傅首先係房入面鋪一張大帆布防水，又係冷氣機下面掛個大長方型盤裝水，冷氣機周圍再包帆布，都幾安全。 師傅通喉都好犀利，首先，用條軟管駁住條冷氣機去水位，跟住飲啖水，好大力咁噴水落去，就通左條喉啦！重係條去水喉入面清走左一大條垃圾。之後，再用一支霧化水槍連藥水去洗部冷氣機，足足搞左一個鐘頭，洗得好乾淨，又無整濕其他地方，賣單合共五百蚊。 希望部冷氣機可以再用多五年啦！哈哈！

千奇百趣，竟然有隻白鴿係屋企個冷氣機槽果度築巢，重生左隻蛋添。請極果隻鴿都唔肯走，點算好呀？ 從屋外望，隻鴿就瞓係個窗同冷氣機中間，重有隻白色蛋。 從屋內望，隻鴿好白同好肥，不過，應該唔係乳鴿，唔食得。

曉凝今日四歲生日，不過病左，但係今日都係照去迪士尼樂園玩。因為今日張全年飛到期啦，點都要去多一次啦！同埋之前應承左要買支公主神仙棒俾曉凝做禮物。 今日睇左「歌舞青春」同埋玩左「咖啡杯」，跟住去 Corner Cafe 食飽飯就返屋企啦。 純吹蠟燭，但係無胃口食蛋糕。 今日的收獲，公主神仙棒同米妮糖果盒。 表姐送的 Cinamon 貼紙和大舅母送的糖果。 大舅父送的雞仔彈珠遊戲。

今日去深水埗「黃金」買左一張高清電視卡，咁就可以係電腦度睇高清電視啦！ 買左 Magic-Pro ProHDTV Silver ，單接收晶片，無其他特別功能，$260。如果要錄影功能，買雙接收晶片的卡，最平都要四百蚊以上啦。 盒內有高清卡、遙控器、電池、遙控接收線同多用途輸入線。 係電腦睇高清，雖然無係電視機睇咁靚，但係畫面都算清楚，很流暢。

幾經波折，今日終於攞到新眼鏡啦！ 話說舊眼鏡已經戴左成七年幾啦，凝媽於是帶我去「 眼鏡88 」配左副新眼鏡做禮物，多謝呀！ 副新眼鏡係農曆新年之前配的，可惜，年廿七第一次攞的時候，個鏡框有少少花左，同埋左邊粒螺絲上唔埋口，開頭無發現，於是戴左一日，年廿八就攞返去維修，要等到農曆新年後先至整好。 年初九整好啦，第二次去攞新眼鏡。點知，今次個鏡框左右兩粒螺絲都上唔埋口，職員試過拆左塊鏡片再屈個鏡框，跟位都係上唔埋粒螺絲，咁好明顯係塊鏡片同個鏡框唔夾啦，又要攞返去工場再執下啦。 最後，今日終於有新眼鏡啦！ 多謝凝媽的生日禮物！

今日送左曉凝去返學，就去飲早茶，然後就入去 迪士尼樂園 玩啦。 因為曉凝返左學，所以主力係玩曉凝平時唔會玩的遊戲（森林河流之旅）同唔會睇的表演（米奇幻想曲、獅子王慶典等）。 今日最主要都係為左睇賀年的「虎虎生福」表演。 「迎福跳跳鼓」 「龍騰鼓舞迎福陣」 「吉祥醒獅賀新歲」 最後，畫左一幅跳跳虎同睇完「迪士尼巡遊表演」，玩到四點鐘就走左啦。 夜晚，梗係返屋企同曉凝一齊食飯同食蛋糕啦!