健康院

今日下著雨，天氣清涼，要帶曉凝去健康院做「學前兒童視力普查」，約左兩點四十五分做檢查，我們兩點三十三分已經到達，等左幾分鐘，就開始驗眼啦。

首先，叔叔問曉凝睇野有無問題，跟住曉凝竟然答話：「好矇呀！」，點解曉凝會亂答架？我就唯有補答話：「平時都無聽佢咁講話睇野矇喎。」跟住，叔叔就叫曉凝望住支筆，檢查有無斜視。然後，就坐係前面問曉凝見唔見到紙上的大英文字係咩，曉凝全部答中。

做完簡單測試，就俾左一幅太陽眼鏡（真係圖中個幅）曉凝帶住，首先遮住左眼，叔叔今次就坐到幾遠，再問曉凝見唔見到紙上的小英文字係咩，曉凝全部答中。之後，再遮住右眼，再問一次，曉凝都全部答中。最後，用左個好似電筒的鎚仔照下兩隻眼，就完成檢查啦，叔叔話曉凝好叻，視力正常。

完成視力檢查後，再等多一陣，就輪到曉凝去磅重同度高啦，體重17.7公斤，身高108厘米。

完成磅重同度高後，又等左一輪就見姑娘啦。姑娘問左「平時邊個照顧小朋友呀？」「小朋友有無咩問題呀？」「老師對小朋友有咩評價呀？」等問題，又問左曉凝「重有無用奶樽同尿片呀？」曉凝就自己答話用杯同無用尿片，姑娘重讚曉凝講野好清楚呢。姑娘重話曉凝的高度係一百個人裏面都高過九十幾人咁多，咁曉凝真係好高啦喎。

見完姑娘，約三點十五分走得，我就完成左今日的任務啦。