生活小小日記

今天買了新的手提電話，是 諾基亞的 N82 ，是第一次購買諾基亞的電話，也是第一次用 Symbian OS S60 系統，很新鮮。有說諾基亞的電話很耐用，希望這電話可以用上五年吧。 不知不覺，N82 已是第七部電話了，曾經用過的手提電話有： 黃色的 Ericsson PF768，黃色好型，好搶眼，依家都覺得好「潮」。 Motorola L2000，好用同扎實，但個樣真係幾老套。 Sony CMD-J70，機身修長又有時代感，左邊有個轉盤，好好用。 Sony Ericsson K700i，樣靚又有得影相，雙面設計。 Motorola C261，薄身，但無功能。 Motorola ROKR E1，好用，夠扎實，掉落地十幾次都無爛。 奇怪，所用過的手提電話，竟然全是直身設計的。

凝女近日返學叻左，重話自己係學校開心笑添，咁乖呀！加上迪士尼張「全年飛」下個月就到期，點都要去多幾次啦！今日，等凝女放左學同瞓醒晏覺，就帶凝女入迪士尼樂園玩啦。 四點幾鐘至到，一入去，好少人呀！ 凝女又係先玩「小小世界」同「小飛象」，跟住就去睇「金裝米奇」，最後，凝女第一次試玩機動遊戲「巴斯光年」，支激光槍識發光，覺得幾好玩。 玩到七點幾，買左盒軟糖，就返屋企啦。

凝女自上星期三開始，每晚都會無故大哭，每次哭鬧的時間都不同，有長有短，有大哭也有小哭，總是哭一會便會自己再瞓覺，瞓得不好。這兩日來，飲左竹蔗水，下一下火，希望凝女可以瞓得好啦。 最近睇左這篇關於睡眠的文章，其中提到的 sleep terrors，很有用，可以參考。 ABC of Paediatric Sleep Medicine Summary On average, a 3-year-old sleeps 12 hours a day Sleep can be divided into light sleep stage (stages 1 and 2), deep sleep stage (stages 3 and 4) and rapid eye movement (REM)/dreamy stage. Sleep disordered breathings include primary snoring, upper airway resistance syndrome and obstructive sleep apnoea syndrome. Pediatric insomnia can be divided into sleep-onset association disorder and limit-setting sleep disorder. Children should be encouraged to sleep alone with consistent and firm bedtime schedule and routines. Sleep terrors are disordered arousals from stage III or IV that occur after 60 to 90 minutes of sleep. It is associated with violent behaviour and possible injury. However, it has a benign course and tends to resolve by 6- 8 years. Majority of children with sleepwalking, rhythmic movement disorder, and slee...

「中秋節，中秋節，月又圓又光，食月餅，玩燈籠，大家哈哈笑。」 這是凝女最近經常掛在口邊的兒歌，好應節呢！ 今日去左 Mega Box，凝女一見到兔仔燈籠就好開心，重即刻唱歌添。原來Mega Box都好多野睇，有 B&Q 賣家居用品，又有 Spot Light 賣各類雜物精品，好多舖頭，可以行足半日。重有一層係專賣兒童物品，有個小小兒童天地，凝女好鐿意玩個滑梯，重學人反轉個人來玩，好瘋狂呀！ 係 Mega Box 食左個下午茶，揀左麵包同拉麵。為了迎合凝女的口味，這個是MOS Burger 特製的腸仔包。其實，是一個熱狗，走洋蔥，走醬，只落茄汁。   夜晚，去左公公婆婆屋企吃飯，食左飯就有雪糕月餅食，凝女食到成口都係雪糕。 食飽飽，梗係去玩燈籠同螢光棒啦！這個凝媽送給凝女的吉蒂貓燈籠，真係好搞笑，係肥肥的士多啤梨上面有個 Kitty 樣，哈哈！

原本以為凝女已習慣返學的生活，點知凝女今日在學校就喊左一場。 話說，今日美勞堂要學手指印畫，凝女最怕整污糟手指，如是者，凝女當然抗拒做勞作，老師怎樣勸導也沒有用，最後，哭了一場，沒有做手指印畫，過了一會才平靜下來。 凝女今晚就話：「學校聽日閂左門，唔駛返學。」 咁都得？凝女好似想用辦法唔返學呢。

凝女的燈籠終於整好啦！ 用左兩個廁紙筒，同一個舊的燈籠手柄作材料。 首先，在兩個廁紙筒上鑿穿了幾個得意的公仔，例如星星、心心和熊人仔，方便透光。 跟著，在外面包上紅色的玻璃紙，用雙面膠紙貼實。 凝女預先準備好一些碎花圖案，然後貼在燈籠上。 最後，把兩個廁紙筒和舊的燈籠手柄連起來，便完成了。 這是著燈後的效果。

這個吉蒂貓燈籠是公公婆婆送給凝女的，不過好快便漏氣了，購買當天便換了一個新的，照片中的燈籠已是第二個了，要成 $49 一個。 可惜，玩了兩天後，也開始漏氣了，還說是正版，品質很差呢。 凝女最喜歡這個手柄，似個咪，可以用來唱歌。 這是著燈的效果，不是很光亮。

好快又到中秋節啦！食月餅？無咁快呀！ 係凝女的第一份功課來了。 題目是要做一個既環保又有創意的燈籠，咁細個就要做美勞功課，其實有一半都係要父母來做，這就是親子活動啊！ 好彩得表姐教路，初步已決定用廁紙筒來做，再包紅色玻璃紙，希望做到一個見得下人的小燈籠給凝女回校威威啦！

表姐剛到韓國旅行，送給凝女一個靚靚手袋做手信。 樂天狸貓女仔好可愛啊！ 背面有拉鏈，唔怕跌野出來。 凝女好開心呀！係屋企都要攬實個狸貓手袋仔。

「第一天 」 凝媽陪著凝女上堂，玩玩遊戲，唱唱歌，吃吃點心，一個鐘便放學了。表姐都來接凝女放學，好開心呢！ 「第二天 」 凝媽陪著凝女上堂，輕輕鬆鬆，一個鐘就放學啦。 「第三天 」 凝媽陪著凝女上堂，在放學前五分鐘，老師要凝媽走開，可惜被凝女發現，立即喊住要媽媽。 「第四天 」 凝女今日要自己返學，無人陪住入學校，入去的時候無喊。結果，凝女放學先來喊，在校內反而沒事，可能凝女在校內得自己一個，不知所措，所以放學後見到凝媽先夠膽喊出來。 「第五天 」 凝女一入學校門口就開始喊，喊左成個鐘，一直喊到放學呀！好淒涼呢！ 希望凝女可以快些習慣學校的生活，開開心心的上學去。 題外話，學校都有得食的牛油方包，凝女係屋企都一樣咁鐘意食，重要對摺左塊方包先食，哈哈！

光陰似箭，日月如梭，凝女明天便要返學了，雖然是託兒班，可是每天也要上課三小時 ，也有很多東西需要準備。 校服，一件白色運動衫和一條紅色短褲，重有一件深藍色冷衫。 白鞋兩對，一對校外著，一對校內著。 備用衣服。 名字織嘜，縫在所有的校服和備用衣服上。

凝女一早起床，便帶她到樓下打韆鞦，玩左一個鐘頭，玩到成身汗同周身痕。 約了公公婆婆十一時正在青衣城的潮樓飲茶，休息一會便出發到青衣城去。青衣海旁現在有很多奧運的燈籠，凝女已見慣見熟，沒有多加理會，只想著快些見到表姐，一起玩耍。 本來在潮樓訂了枱，可惜還要等位，不知要等多久，跟著走到稻香，一問便立刻有枱了，不用說，當然是到稻香飲茶啦！今日重有表姐同表姐表姐一齊飲茶，好開心呢！

凝女在睡前都要打機五分鐘，玩咩呀？之前就玩 NDS 的 太鼓之達人 ，最近就轉左玩 PSP 的 Virtua Tennis 3 ，玩裏面的小遊戲，用個網球去打跌個保齡球。玩左一陣之後，我就會話：「部機無電啦！要差電啦！明晚再玩啦！」凝女又信呀，咁就會乖乖去瞓覺啦！

凝女本來成日都企係度睇電腦同聽歌仔，最近就醒左，坐係張膠櫈仔度，無咁攰。不過，張膠櫈仔唔係咁夠高，凝女又越來越高大，坐得唔太舒服，又驚佢坐壞姿勢。有見及此，凝媽就左揀右揀，想幫凝女買張枱同櫈啦。 最後，揀左 Step2 的枱櫈套裝，一張枱同兩張櫈，顏色鮮艷，膠質不錯，適合兩歲或以上，很安全。 剛好，在沙田的 Toys"R"Us 購買，可以用$50的優惠券，便買了一盒回家。 一張藍色，一張紅色，好靚呢。 凝女終於有自己枱同櫈啦！食飯又得，畫畫又得，玩咩都得，得左！