生活小小日記

今日同曉凝去荃灣買新衫過年，曉凝見到桃花好開心，即刻話要同桃花影幅相。 買左兩件 Cinnamon 衫同一條裙仔，完成任務，就去食飯啦。 曉凝最鍾意食就係飯團同凍烏冬啦。 咖喱牛肉飯，好味呀。 兒童餐，都幾多款式，不過就好淡口。

已經二十幾年無返鄉下啦，鄉下個樣係點都唔記得啦。今次係因為二弟要結婚，所以應承左阿公（即係我爺爺）返去飲喜酒。目的地係「斗門鎮」的「舊赤水坑村」，係邊度呢？我都唔係好知，睇下下面幅地圖先啦。就係綠色箭咀指住的地方。 本來諗住星期六婚宴當日先返去，不過，我就要自己一個人晨早八點鐘係澳門搭車去「拱北」，再搵人係「拱北關閘」接我。要八點鐘到澳門，咁即係要七點鐘船啦，又即係零晨五點半鐘一定要起身出發啦，好早呀！無可能啦！再加上我廿幾年都無去過「拱北」，點識路去呀！所以，就唯有早一日跟阿叔一家一齊返去啦。 一月二十二日（星期五） 下午兩點半，曉凝瞓晏覺，我就出發啦。 下午四點半，係上環信德中心搭超級噴射船去澳門，個人覺得都係普通噴射船較為穩定同唔怕暈船浪。 下午五點半，到達澳門連過關，都算快。跟住，就去左 維景酒店 （即係以前的京澳酒店）放底行李，休息一陣，就出去食晚飯啦。 由 維景酒店 行到去議事廳前地，無睇錯，係行架，係用腳行架，完全無搭車架。係議事廳前地附近行左幾個圈揀野食，最後揀左「煥記」食飯，即係好出名的「陶陶居」隔離。 食飽飯，當做下運動，又係周圍行，行左去新葡京、永利、MGM同星際，周圍影下相，真係行到攰啦，再行返去維景酒店，無睇錯，係行架，係用腳行架，完全無搭車架。 夜晚十一點，再落街買左一碗水蟹粥同一碗魚片粥返去做宵夜，食飽飽就即刻瞓覺啦，因為聽日要好早起身。 一月二十三日（星期六） 朝早七點半起身，落街食早餐，食左一個沙嗲牛肉蛋出前一丁，都幾唔好食。退房後，由酒店直接搭的士去關閘，要30蚊。 早上九點五十分，順利過關，本來諗住搭609路公共汔車返去「井岸」，不過要成兩個鐘頭車程，最後都係搭的士由拱北」到「井岸」，不打錶（打錶要成120蚊人民幣），議價後100蚊人民幣。今次真係搭正一架瘋狂的士，我坐車頭司機隔離，架的士逄車過車，不論係貨車、公車、私家車或者任何有轆的車，一律要扒頭，左穿右插，驚險萬分，原本要兩個鐘頭的車程，依家半個鐘就到左「井岸」啦。 早上十點半，終於安全到達阿公屋企，今次係第一次去阿公屋企，阿公住係一樓，上落都要行樓梯，都幾唔方便。不過，環境都算清憂寧靜。會合阿公後，就一齊搭609路公車返去「舊赤水坑村」。 中午十二點回到「舊赤水坑村」，農村地方真係好大風，今日重天陰，又有微雨，好凍呀！行多十分鐘路，就到左二弟買地新起的村屋，已經有

星期六開始發病，喉龍痕。 跟住星期日就咳，喉龍痛，去左睇醫生。 今日重發燒燒到攝氏39.6度（華氏103.3度），又睇多一次醫生。 依家好番好多啦。

今日係屋苑一年一度的遊戲日，有攤位遊戲、跳彈床、電池車、美勞攤位同終極大抽奬，有得食又有得玩，節目好豐富呀！所以每年都一定參加，唔好執輸呢！ 曉凝開頭淨係掛住自己玩吹波波，唔玩遊戲。 跟住，曉凝就去左玩滑梯同打韆鞦。 曉凝掛住食多過掛住玩，總共食左兩碗啫哩糖、一條香腸、半碗豆腐花，同埋飲左一罐甘蔗水。 玩到兩點半，就同表姐一家去左 太興燒味 食下午茶。本來係時候返屋企瞓覺，點知，食飽飽後，曉凝又有番心情去玩攤位遊戲，就又去玩多次啦！曉凝自己玩「球分高下」同「奬品滾滾來」，重再嬴多左兩份細奬品添！好野呀！ 凝媽同曉凝一齊嬴的禮物，總共有十四份，好犀利呀！