生活小小日記

今次瑞華行開倉，買左一塊「喜羊羊與灰太狼」砌圖同一部穿珠仔機俾曉凝，砌圖$10，穿珠仔機就只係$20，好抵呀！ 「雙子公主」穿珠仔機，可以整一條電話繩、一條手鏈同一條頸鏈。

話說個電話壞左，以為過左保養無得整啦，點知睇下張單，原來係舊年九月二十一日買，咁我上個星期日（即係九月二十日）等曉凝瞓左覺，就攞部機出去旺角 諾基亞 整。 本來一個半鐘後就整好，不過，曉凝病左，都係快些返屋企先，唔等部機整好就走左啦。 所以，星期五至出旺角攞番部機，換左個顯示屏，無晒黑點啦！ 保養期內不用收費，真係時間啱啱好，壞得好準時，遲多兩日就過保養啦！維修後重加多三個月保養添，即係到十二月二十日，都幾好呀！

今日婆婆送左個燈籠俾曉凝，係小朋友見到鐘意的喜羊羊燈籠，重係曉凝自己落街揀架。 燈籠上面係喜羊羊，下面係一架飛機，機身上面有好多喜羊羊公仔。整體設計以紅色同磨砂白色為主，好有特色，重有音樂同著燈。 凝媽就送左好多螢光棒俾曉凝，圖中所見，你估曉凝用螢光棒砌左乜野？ 答案係一架飛機。

休息左兩日，曉凝好番好多，已經無嘔，不過亦都瘦左好多啦。好番晒，今日可以返學校開生日會啦。 今朝一早七點半，曉凝已經起左身，重話要即刻返學校開生日會添，重叫姐姐快些幫佢換衫，曉凝真係好鐘意返學。 曉凝話今日係學校食左蛋糕同「雞鳥」，到底咩係「雞鳥」呢？除此之外，重飲左一包利賓納。 雖然今次唔係曉凝的生日會，但係學校都送左一條毛巾仔同一個奶樽型匙扣俾其他小朋友，好實用呀！ 重有一個生日會專用限定手挽袋，幾得意架！原來依家返學校除左帶個書包外，開生日會就要用呢個生日會專用袋。

以為曉凝好番，今日就返學啦，點知，放學時變得好攰，成身都有些發熱。 結果，曉凝今日又嘔左兩次，又有發燒，都係未好番。 今晚再睇多一次醫生，醫生再開多一支黃色腸胃藥，加重藥力。 睡覺前，食左腸胃藥，又用左塞肛止嘔藥，希望曉凝快些好番啦！

曉凝今日無嘔同無肚仔痛啦！好番好多啦！ 不過，今朝起身就發燒，食左兩次退燒藥，個人好攰同無晒精神。 夜晚已經無發燒，成個人即刻精靈番晒啦！好野！

今日曉凝病左，嘔左好多次呀！重成日都肚仔痛呀！ 朝早睡醒後，作嘔左兩次。因為無食野，都無野嘔出黎。 飲早茶時，食左粥同腸粉，係酒樓全部嘔晒出黎。 即刻去睇醫生，應該係腸胃炎，有止嘔藥、腸胃藥和止疴藥。 午餐食通粉，再睡午覺，睡醒後又嘔左兩次。 晚上食粥，食左兩啖，無胃口，跟住又嘔，重係黃色添，一定係黃胆水啦！ 無辦法啦！食完藥都嘔左三次，一定要用塞肛止嘔藥，盡快止嘔。 曉凝全日食完就嘔，等於無食過野，唯有落街買盒「得力素葡萄糖粉」，沖杯葡萄糖水比曉凝飲，飲左個人就精神返少少啦。 個人認為今次腸胃炎有兩個疑兇，第一個係麥當勞（琴日食早餐），第二個係意粉屋（琴日食午餐）。總之，出街食野都係要小心啦！唔好亂食野呀！

今日帶曉凝去超級市場，曉凝見到珍寶珠就話要買，咁就講明今晚食飯要食六舊菜，曉凝答應，咁就買左一粒黑莓味珍寶珠啦。 返到屋企，食左一半食唔曬，最後都係要俾我食。今晚食飯，曉凝食左十舊瓜。

部手提電話用左一年左右，今朝突然出現左成三十幾粒死點，重要幾集中，全部係顯示屏左面中間位，成個圓圈。 點解咁快就壞架？

今日買了一把新的 Cinnamon 傘子給曉凝，因為之前婆婆送的 Hello Kitty 傘子已變得太細了。這把傘子是50厘米的，應該足夠用到小學吧。 打開傘子要拿著中間白色的圓柱，用手來推開傘子。收傘子也一樣，只要拿著白色的圓柱，拉回來便完成了，比較安全。 傘子有兩塊布是透明的，不會擋住視線。 傘子的骨架也是膠做的，也較安全。

一到九月，又係買鞋的好時機啦！ 開學前買鞋。 唔啱著買鞋。 爛左鞋買鞋。 返工要買鞋。 腳痛又買鞋。

家中原本已有三支電子探熱針和一支耳用探熱針，可是，幼稚園要求每天也要為曉凝量體溫，每天都要篤耳仔真的不是一個好辦法。於是，凝媽便決定要買一把紅外線探熱槍，可以神不知鬼不覺，遠距離地量體溫。 買這支探熱槍，理由是個人認為這個顏色（紫色配白色）給人潔淨的感覺和槍身塑膠用料不差，可以量度體溫由30度至43度，還可以量度其他物件表面溫度由0度至60度，溫度範圍已很夠用。至於準確程度，近些會高溫少許，遠些側會低溫少許，誤差應是在可接受範圍內。 這支探熱槍的型號是 DT-8806H，中國製，沒有固定牌子，所以貼什麼牌子也可以，買的時候，只要認著這個樣和型號便可以了。 在太子金都商場附近購買，特價$428。

曉凝今日開學啦！開始返幼稚園K1，幼稚園是一所天主教學校，曉凝就讀上午幼善班，希望曉凝可以在愉快的環境下學習和成長。