生活小小日記

凝女在睡前都要打機五分鐘，玩咩呀？之前就玩 NDS 的 太鼓之達人 ，最近就轉左玩 PSP 的 Virtua Tennis 3 ，玩裏面的小遊戲，用個網球去打跌個保齡球。玩左一陣之後，我就會話：「部機無電啦！要差電啦！明晚再玩啦！」凝女又信呀，咁就會乖乖去瞓覺啦！

凝女本來成日都企係度睇電腦同聽歌仔，最近就醒左，坐係張膠櫈仔度，無咁攰。不過，張膠櫈仔唔係咁夠高，凝女又越來越高大，坐得唔太舒服，又驚佢坐壞姿勢。有見及此，凝媽就左揀右揀，想幫凝女買張枱同櫈啦。 最後，揀左 Step2 的枱櫈套裝，一張枱同兩張櫈，顏色鮮艷，膠質不錯，適合兩歲或以上，很安全。 剛好，在沙田的 Toys"R"Us 購買，可以用$50的優惠券，便買了一盒回家。 一張藍色，一張紅色，好靚呢。 凝女終於有自己枱同櫈啦！食飯又得，畫畫又得，玩咩都得，得左！

凝媽今日送左一個 Piglet 公仔俾凝女，凝女好鐘意，成日抱住 Piglet，瞓覺都要攬住，真係估唔到。等我下次送隻高達俾凝女，睇下凝女鐘唔鐘意先？

「落雨不怕，落雪也不怕，就算寒冷大風雪落下，能夠見到他，可以日日見到佢面，如何大風雪也不怕。」 凝女好鐘意這首電視廣告歌，個廣告有隻熊 Bear Bear 係度一路行一路唱，凝女已經學識點唱，電視的魔力真大啊！

本來今天是要帶凝女到迪士尼樂園玩，可惜，凝女從上星期六開始咳咳，星期日就發燒，一連燒左三日有多，這兩天才開始好轉，要多多休息。加上這個星期的天氣都係落雨同閃電，所以，帶凝女到迪士尼樂園玩的計劃就取消左啦，凝女要留係屋企瞓覺覺。 早上，陪凝女到樓下吹波波同玩韆鞦，玩完就返屋企食飯，凝女一點半就瞓左，凝爸就偷偷地一個人走去迪士尼玩啦！ 一個人四週圍影下無聊相，好寫意呢！ 今日好多人呀！排隊條龍好長好長，凝爸就咁一樣遊戲都無玩過，「米奇水花巡遊」都無睇，三點半就走左啦。 四點返到屋企，凝女已經醒左，又陪凝女去樓下吹波波同玩，真是愉快的一天啊！

話說個馬桶成日漏水，跟住就自動再入水，如事者，不斷重複，好大聲好嘈呀！足足漏左成兩個星期，開頭漏少少，跟住越漏越快，嘈住凝女夜晚瞓覺，今日終於搵左樓下個水喉師傅上來整好佢。 師傅一望就知係個注水閥（即係沖水去馬桶個裝置）壞左，搞到成日漏水，師傅就換左個新注水閥 Kimsion C-5092A 落去。原來換注水閥係好大工程，要成個水箱拆出來，才可以安裝，又重又大，又拆又裝都幾麻煩，自己換一定換唔到。 至於個進水閥（即係入水去水箱個裝置），師傅又換左個新 Fluidmaster 400UK073 落去，其實之前個 Fluidmaster 200 都未壞，不過，師傅話既然換開，就最好一次過換，唔駛煩，唔駛分兩次整。好啦！信你啦！ 最後，師傅整左一個鐘頭搞掂，連工包料，總數$450。 有興趣可以參考 HowStuffWorks " How to Repair a Toilet "。