生活小小日記

Code Geass 叛逆的魯魯修 R2 （第二季）係今季最好睇的動畫，劇情比第一季更加峰迴路轉，畫功一流，集科幻、戰略、友情、愛情、邪惡、家族情仇等多個元素於一身，是必看的好片，強烈推介！

睇完牙醫啦！原來隻牙以前補銀粉果度斷左，跟住有少少蛀左，補番就無事啦！牙醫話補銀粉闊度通常係1.5mm至2mm左右，我之前補牙的闊度只有約1mm闊，所以好容易斷咁話。二十分鐘就搞掂，收費三百五十元。 除之此外，醫生重話我兩隻門牙都有少少蛀牙，要補，不過遲些先算啦。 反而，醫生話我左邊兩隻智慧齒無咩事，唔發炎或唔蛀牙都唔駛理佢，好嘢！

凝女今日去左沙田玩，有無發現有咩唔同呢？就係凝女著左裙啦！配件紫色米妮老鼠短袖衫，似番個女仔呢。 今日重約埋表姐一齊玩，同McDull影下相。 又係反斗城踩單車同玩彩帶。 跟住去左攞扭扭汽球同坐Snoopy船，紅色心形扭扭氣球，好開心呀！ 不過，玩到三點幾，凝女就好眼瞓，返左屋企瞓覺啦。

今晚食消夜，一食塊鵝片，就咬崩左隻大牙，塊鵝片明明係無骨的，咁應該都係蛀左隻牙啦！ 好驚呀！ 又要去睇牙醫啦。

凝媽近日迷上在電腦觀看即時的日本電視節目，但又怕看電視時的聲浪太大，影響凝女睡覺，所以凝爸便向凝媽提交一個藍牙無線解決方案。用藍牙耳筒睇電視或聽歌，都不需用喇叭，原全靜音，也沒有耳筒線阻礙，無敵呀！ 也趁這個母親節送給凝媽這個小禮物。 i.Tech Clip Radio 藍牙立體聲耳筒，v2.0，有A2DP、AVRCP等，重有獨立收音機。 i.Tech BlueCON U2 藍牙轉接器，v2.0，有A2DP、AVRCP等。 藍牙轉接器要先裝在電腦的USB上，再將藍牙耳筒和轉接器配對一次，之後，便可隨時隨地將電腦的聲音輸出到藍牙耳筒，有效範圍約兩米，還是立體聲呢！藍牙耳筒其實還可與手提電話公用，一舉兩得，抵呀！

今日母親節，一早便到尖沙咀飲茶，吃飽飽，凝女跟著表姐到處玩，表姐推介這個在Giga Sports內的新奇玩意，可以投射你的臉到那個大公仔上面，凝女即刻試玩，好得意呀！ 又跟表姐到 玩具反斗城 玩餐飽，玩左手推車、呼拉圈、籃球等，玩到癲！ 玩到約三點，帶凝女到海港城的 Rice Paper 睡午覺，吃個下午茶。凝女睡了一個半小時，睡醒後剛好是時候到旺角的美心大酒樓吃晚飯。 雖然是母親節，凝女今日收獲最豐富，有小童廁所板、沙灘波、游水紙尿片、「 睡安豬 」枕頭（初生到六歲適用）和睡前故事書兩本。

今日，一上到東涌線地鐵已見到成車都係人，重有好多小朋友，心知大家都係去 迪士尼 玩，無辦法啦，幾多人都照去啦！ 到達樂園，第一件事當然是到「市鎮會堂」拿貼紙，凝女立刻把貼紙貼在身上。 迪士尼樂園真係人山人海，平時排幾分鐘的灰姑娘木馬、小飛象同咖啡杯等，都要排多約三倍時間。好辛苦呀！要抱住凝女多三倍時間呢。 小小世界就真係多人到排到出門口，完全無諗過去玩，唔想去挑戰自己的耐性極限，係門口影左兩幅相就走左啦。 連歌舞青春都多左好多人睇，不過凝女鐘意睇，幾多人都照睇啦！ 去左「廣場餐廳」食午餐，幾好食，似酒樓。不過，最緊要係環境舒適，有冷氣，可以俾凝女乖乖瞓晏覺。 瞓醒晏覺，剛好睇到花車巡遊，再玩多一陣，睇完第三場「歌舞青春」，就去「大街餐廳」食晚飯，食左一個熱狗餐同一個兒童餐，晚上七時便回家去了。