除夕的一天
今天帶凝女去探望太爺爺和叔仔一家，起初，凝女顯得很陌生，寸步不離。後來，到了酒樓，吃了腸粉和炸雲吞，吃飽飽，心情開朗起來，便很開心地和叔仔一起玩耍。 晚上，到葵芳吃晚飯，凝女一看到聖誕樹便立即嚷著要影相。 凝女很合作，還會自己望鏡頭同擺姿勢呢！
文章
撈金魚
本來無打算買聖誕禮物俾凝女，點知今日去到尖沙咀玩具反斗城，凝女一見到個吉蒂貓撈金魚，就拿住唔肯放手。因為表姐都有這個玩具，凝女曾經同表姐一齊玩過，不過都好耐啦，竟然重記得。 好啦！見三十蚊都唔駛，就買俾凝女玩啦！
聖誕老人傳說
昨晚是平安夜，為了讓凝女早些睡覺，便說了一個聖誕老人傳說給她聽。 聖誕老人每年會來一次，坐在「小鹿班比」拉的鹿車飛來（凝女不知什麼是鹿，但知道什麼是「小鹿班比」）。 聖誕老人會從廚房的抽油煙機爬進來，看到乖的小朋友睡著了，會送給小朋友魚仔餅和一粒瑞士糖（凝女咳咳，不能吃太多糖果啊），放在 吉蒂貓聖誕襪子 裏，睡醒後便有得吃了。 凝女真的相信啊！還信到十足十！不過，凝女整晚說著明天要吃魚仔餅，輾轉反側，不能入睡，真是弄巧反拙。早上七時，凝女一起床（平常是八時才起床的），便急不及待地衝去找魚仔餅和瑞士糖，還要馬上吃掉才罷休。
發燒
凝女的流鼻水和咳咳已經成三個星期，由上個月十四日開始病，睇醫生都睇左七次啦！食藥就食左半個月有多，都重未好呀！ 所以，今日請假帶凝女去尖沙咀睇兒科醫生，預約了十時四十分，準時到達。首先，護士例行地幫凝女探熱，點知成38.4度，發燒添！之前都無燒架？ 凝女不斷叫：「走呀！走呀！」，用盡辦法，好不容易，等左一個鍾頭，終於輪到凝女看醫生。 經診症後，醫生認為凝女有鼻敏感和氣管敏感，先開了五日藥（含抗生素）來治療發燒、咳和鼻涕，再開了十日的善古寧來舒緩氣管敏感的症狀。 希望凝女快些好番，不用再覆診了！
哈哈笑
今晚，無意中望上天，嘩！好得意呀！點解天上面有個哈哈笑？ 原來係金星、木星同月光光一齊組合出來的。左邊最光個粒就係金星，右邊好暗個粒係木星，下面個口當然係個月光光啦，真係難得一見呀！最衰無帶相機同腳架啦！
海洋公園
今日又係公司一年一度的大旅行，目地的係海洋公園。無錯，係悶到嘔的海洋公園！你同我由細去到大，去過無數次的這個公園。 今日活動係一組六個人（係六個唔識的人），走來走去，一邊影相（有分），一邊搵答案（有分），一邊玩機動遊戲（有分），最高分的一組會有奬品。 好彩我個組用左「見到咪影囉，識答咪答囉，好玩咪玩囉。」的策略，所以，都唔係好辛苦。 路過太平洋海岸，其實幾靚，不過，行過就算啦。我們都是路人甲。 摩天輪、跳樓機和過山車係完全無玩過，亦都無想過同行過去個邊。 食完飯，行左海洋館、水母館和中華鱘館，就搭纜車返過去正門。再去熊貓館，影多張熊貓相，三點鐘就去交功課啦。 終於完成整日的無聊活動，即刻走人啦！重等咩呀！
幼稚園報名
今天要為凝女到幼稚園報名，是在家附近的一所天主教幼稚園。 早上吃了個會肚子痛的早餐，凝媽和凝女便到青衣運動場參加學校舉辦的親子運動會，我則到幼稚園為凝女報讀明年開課的幼兒班。 八時五十分到達幼稚園門口，已有約二十人在排隊，而且還越來越多人。等到九時十分左右，開始分批進入幼稚園報名，交了報名表，約了下星期六上午面試，再繳交相關費用，便完成報名程序，最後會有一支四色原子筆作為紀念品。 手續辦妥，剛好九時三十五分，立即跑到運動場參加凝女的親子運動會。
NAS 儲存
屋企部電腦越來越多相，個硬碟就快滿瀉，本來想買個 2.5 吋外置式硬碟來放相，價錢又平，又可以攞住周圍去，都幾好呀！不過，思前想後，又驚將所有相放係一個硬碟度，隻碟有冬瓜同豆腐，咁就渣都無啦！好驚呀！ 唯一辦法就係將資料放係多兩隻或以上的硬碟度，砌多部電腦做檔案伺服器，係好呀！但係就無地方又大部，唔夠慳位。 最簡單同慳位就係買部 NAS (Network Attached Storage) 行 Raid 1 （兩隻硬碟都裝著一無一樣的資料，壞了任何一隻碟，都可以更換，不怕資料遺失）或者 Raid 5，不過 Raid 5 實在太貴，未計硬碟都要成四千幾蚊，咁最後都只有選擇 Raid 1 啦。 今日去黃金商場地庫買左一個 NAS 儲存裝置， Synology DS207 ，貪佢個樣白白淨幾靚仔，再買多兩隻 Seagate 500GB 硬碟，一齊買再講價先平得廿蚊，好過無啦！ 安裝步驟好容易，大人同細路都識： 開蓋 放入硬碟一 放入硬碟二 幫兩個硬碟插電線同 SATA 線 閂蓋 最緊要插 LAN 線 開機 入隻 CD 去電腦，會自動係個網絡度揾到個 NAS，跟指示去設定 Mirroring，搞掂，好簡單呢 大功告成。 價格如下： Synology DS207 - $1780 Seagate ST3500320AS 500GB - $440 Seagate ST3500320AS 500GB - $440 合共：$2640
暫別迪士尼
「一年容易又到期」，唔係期貨同期權到期，係張迪士尼全年飛到期啦！今日係最後一日，梗係要帶凝女去玩多一次啦！ 放左學，食左午飯，本來要瞓覺豬，點知凝女實在太興奮啦，唔肯瞓晏覺，咁就唯有出發去迪士尼啦！ 三點半到逹，凝女一到迪士尼，成個人醒曬，無睡意，即刻跑去睇巡遊。 睇完巡遊，重問 CM 攞貼紙添。個樣幾神氣！係凝女獨自走去問哥哥姐姐攞貼紙架！ 凝女最愛節目：金裝米奇，有歌聽，有舞跳，有老鼠（係米奇同米妮），真係好好睇。 凝女最愛節目：歌舞青春，又係唱歌同跳舞，青春無敵呀！ 夜間巡遊未開始，凝女就係隔離個攤位度玩吹波波，好開心，重好玩過所有機動遊戲呀！ 夜光鬼魅巡遊，嘩！阿 Jack 好高呀！ 萬聖節梗係要有南瓜人啦！ 鬼魅樂團。 睇完鬼魅巡遊，行左一陣舖頭，一到放煙花就走啦，無咁多人。 買左支激光槍俾凝女，凝女好鐘意玩呀！有聲又有光，好似玩緊巴斯光年咁。
幼兒園時間表
凝女返學都有成兩個月，大家想唔想知凝女在學校通常做咩呢？這就是凝女在校內的時間表，請欣賞。 時間表 2008 - 2009 N. 1 Bear 班 08:30 - 09:00 返學 （註：全家總動員陪凝女返學） 09:00 - 09:10 早操 09:10 - 09:40 音體活動 （註：唱歌仔） 09:40 - 10:10 主題學習／談話 （註：我都唔知？） 10:10 - 10:40 圖工／故事 （註：勞作同講故仔） 10:40 - 10:50 排洗 （註：洗手同去廁所） 10:50 - 11:10 茶點 （註：有得食） 11:10 - 11:20 排洗 （註：洗手同去廁所） 11:20 - 11:50 自選玩具／模擬角 （註：有得玩） 11:50 - 11:55 整理及預備放學 11:55 - 12:00 放學
學之園開放日
今日係學之園的開放日，就帶凝女去參觀同見識下啦。約十時多到達，好多人呀！要排隊進場，一個跟一個，入場重有個環保袋送添！ 凝女初時都有些驚，不過見到有好多氣球在幼稚園，便變得十分投入，還說要快些拿個氣球離開。 校內有六個活動課室，一個活動大堂，地方也算大，帶著凝女續個課室參觀和玩耍，玩左砌圖、油顏色和水墨畫。凝女最喜歡油顏色，也很執著，每種顏色也要畫一筆，一隻色都不能少！ 之後，就出左去大堂玩三輪車，凝女就唔識踩，只係識用兩隻腳去行同推架車。 做完運動，見到有個課室有野食，凝女就入左去塗果醬同食方包啦！不過，凝女只吃方包不吃果醬。 食飽飽又出返去大堂玩瀡滑梯，個滑梯都幾大，凝女玩得好開心，起碼玩左十幾次。 玩到十二點，就走啦！臨走的時候，還有氣球送，凝女要左個黃色氣球。可惜，去到青衣城附近就爆左啦！唯有帶凝女返轉頭，去幼稚園攞個新氣球，今次就要左個粉紅色氣球。 今日，有得食有得玩，真係開心啦！