生活小小日記

豬B的第一個平安夜就係因為「我」，令到她無得出街玩，要媽媽同豬B陪我屈係屋企發霉。

一看豬B這個造型, 便知道她發燒了(這麼大的退熱貼, 你還看不見?), 醫生說這次是玫瑰疹, 足足吃了三天退燒藥, 退燒跟著發燒, 每四小時一個循環, 現在己經退燒並出疹了. 再休息兩天, 出完疹便會痊癒了.

今日帶了豬 B 去影相, 不是自己影那一種, 是去了 Studio 123 , 有攝影師幫豬 B 影可愛靚相, 有五個造形, 共 118 張數碼相, 價錢 $388 (可揀 38 張數碼相底, 不沖曬), 可再加 $200 要所有數碼相底. 最後, 不用多想, 當然是用 $588 要了所有豬 B 的天真可愛靚靚相底啦.

豬 B 最近好鍾意講: 阿巴巴巴巴 ... 好好聽呀!

就係換左兩把散熱風扇返黎啦, 都係加多$20. 一把係 Cooler Master X Dream P775 ($110), 另一把係 Gigabyte G-Power Lite ($190). 因為怕再裝唔到, 所以換左一個正常size, 再加一個較高身的, 肯定有一個裝到. G-Power Lite 正面 X Dream P775 正面 原裝的 Intel 散熱風扇 完成後的 X Dream P775 散熱風扇

豬 B 需要有一個安靜的睡覺環境, 但係部電腦又好嘈, 所以今日去黃金買左呢把超大 CPU 散熱風扇 ( Zalman CNPS7700 AlCu ), 價錢$280, 重貴過一般的機箱, 不過噪音就只有約 20 ~ 32dB. 可惜太大把, 裝唔到落去個機箱入面 (早知度清楚至去買啦), 好彩重未開盒, 唯有明日去換個把細D啦. 前面 後面 太大啦, 放唔到呀!

光陰似箭, 日月如梭, 豬 B 己經七個月大啦, 識得自己坐係度, 玩下玩具, 間唔中就爬兩下, 不過最喜歡都係扶住床邊企係度, 扮勁扮識企啦.

豬 B 今晚識爬啦. 唔駛用肚, 只係用手同腳, 肚離地, 向前爬. 為左食星星餅, 可以不停咁爬, 好嘢!

今日宇宙人 (即係外藉老細) 請食 Tea 慶祝中秋 (早左成個星期), 以為係一般茶餐廳下午茶, 點知送來一盒盒薄餅般大小的紙盒 (心想: 唔通係十個薄餅, 好飽呀, 點食薄餅呀, 唔好玩啦). 打開原來係一個個圓型的圈, 由於見識少, 我從未食過呢個圓型圈, 亦唔知佢有咩來頭, 只知個圈叫冬甩. 無所謂啦, 好過食薄餅呀. 跟住我就揀左一個上面有糖粉 (ring 肉桂糖衣), 第一口感覺勁甜, 不過好鬆化, 好食呀. 食完一個, 又食左一個中間沒有窿的 (shell 紅莓夾心). 第一口感覺又係勁甜, 不過又係好鬆化, 再咬一口發現原來有餡, 係紅莓, 嘩! 勁勁勁甜! 食完即刻勁飲左成杯水. 今晚有人話我知呢個圈原來係有來頭的, 就是美國無人不識並於世界各地有超過三百間分店的冬甩專門店 Krispy Kreme . 就係咁, 無端端食左跟排都幾出名的食品啦.

近日想買 Gerber 星星餅 俾豬 B 食, 可惜去過荷花同寶寶反斗城都無得賣.

光陰似箭, 日月如梭, 豬B己經六個月大啦, 識得自己坐係度一陣, 玩下玩具.

豬 B 昨晚零晨兩點半鐘突然發燒, 好唔舒服, 喊左好耐, 肛探有103度, 好熱呀, 即刻飲退燒藥水, 體溫開始回落. 好擔心, 每隔半個鐘頭就幫豬 B 探熱. 到早上六時半, 藥力過後, 又再燒, 肛探有102度. 八時四十五分, 到樓下睇醫生, 原來豬 B 喉龍發炎, 又發燒. 豬 B 要飲三支藥水, 一支退燒 (pink), 一支消炎 (red), 一支感冒/消腫 (yellow). 見到豬 B 病得咁辛苦, 媽媽唯有請假悉心照顧豬 B 啦.

下午五時, 見豬B瞓著左, 有番少少時間做自己野, 立即去睇 Gundam Seed C.E. 73 Stargazer 第二集. 呢套片目前出到第二集, 每集約二十分鐘, 畫面係好靚, 戰鬥場面亦好有動感. 不過, 睇左兩集都唔知套片講咩. 我認為對高達有濃厚興趣的人, 可以一看.

上午七時, 準時起床, 飲奶, 唔肯再瞓, 係度玩 上午九時四十五分, 睇爆龍戰隊, 一路睇, 一路同爸爸玩 上午十時四十五分, 飲奶, 剩兩安, 唯有開糊仔, 食左一半糊仔, 跟住瞓左 下午二時三十分, 醒左, 就去沖涼 下午三時, 香噴噴, 飲奶, 剩半安, 又唔肯再瞓 下午四時四十五分, 左搖右搖, 再加無敵 Combi 奶咀, 終於係爸爸懷抱瞓著左啦 晚上六時四十五分, 俾人嘈醒左, 飲奶, 剩一安, 係度玩, 睇美女廚房 晚上十時十五分, 好眼瞓, 飲奶, 飲曬 晚上十時四十分, 瞓覺豬

在媽媽的努力下, 寶寶笑了.

曉凝豬豬就黎四個月大啦. 佢已經練成反身神功啦, 可以向左反, 又可以向右反, 跟住長時間趴係到, 再抬高個頭周圍望. 佢重學識扭計, 扭眼瞓, 瞓唔著就喊住要人抱抱, 真係好曳. 又鐘意成日擺雙手入口, 來探索呢個世界, 攪到成面口水, 醜八怪呀.

我依家用緊部新 Dual Core 2.66GHz 電腦, 好似快左啦. 我足足用左兩晚去買齊所有零件, 一晚去左旺電, 一晚去左高登, 再用左三晚來砌好部新機, 前晚終於砌好啦. 其中遇到好多問題, 原來 CPU 個風扇係好難裝架, 跟住又唔識插邊條電線去邊個位至好, 又揾唔到硬碟, 原來自己砌機都幾煩, 真係俾 100 蚊叫間舖幫你砌就唔駛煩啦. 我的電腦最終組合如下 (2006年 6月 27日 價格): Intel PD Dual Core 805 (2.66GHz)CPU/2x1M BOX HK$ 823.00 (深水埗 Centrafield) ASUS P5LD2 Deluxe I945P M/B HK$ 1,020.00 (旺電 Jumbo) Corsair DDR-2 533 1G KIT (512Mx2) -VS512D2 HK$ 590.00 (深水埗 Centrafield) WinFast PX7300GS PCI-E 256MB DDR2 TC HK$ 460.00 (深水埗 Centrafield) Hitachi 160GB 16DLAT80 7200R/8MB/DMA150 HK$ 490.00 (旺電 Jumbo) DELTA ServerPower 460W GPS-460BA-102A P.S. HK$ 470.00 (深水埗 Perfect 唯美) 2the Max 勁量牛 DA08A Case HK$ 170.00 (深水埗 Perfect 唯美) 合共: HK$ 4023.00

我依家重用緊部 P3 800MHz 電腦, 好舊啦, 所以想砌過部新機. 去過旺電, 去過高登, 計來計去, 左格價右格價, 都係自己散買零件後, 自己砌就最抵. 好! 下個星期就去買, 等粒 CPU 再跌多 10 蚊先. 自己人平機組合提意如下 (2006年 6月 22日 價格): Intel PD Dual Core 805 (2.66GHz)CPU/2x1M BOX HK$ 833.00 ASUS P5LD2 Deluxe I945P M/B HK$ 1,075.00 Corsair DDR-2 533 1G KIT (512Mx2) -VS512D2 HK$ 610.00 ASUS EN73GS2 EN7300GS/HTD/256M PCI-E HK$ 470.00 Hitachi 160GB 16DLA380 Serial ATA II HDD HK$ 490.00 DELTA ActivePower 420W GPS-420BA-102 A P.S. HK$ 400.00 GTR C707/BK Case HK$ 170.00 合共: HK$ 4048.00 如有多餘錢的話, 建議再度升級如下: Intel PD Dual Core 930 (3.0GHz)CPU/2x2M BOX HK$ 1,350.00 Kingston DDR-2 533MHz 1G KIT (512Mx2) HK$ 706.00 Kingston DDR-2 667MHz 1G KIT (512Mx2) HK$ 786.00

唔見左銀包都有一個星期啦, 到依家都係無任何消息, 都無希望架啦, 未解決, 亦都無辦法解決呢. 所有已報失的提款咭和信用咭都剛剛攞番, 只係欠智能身份証重未得閒去補領, 不過都會等佢再跌六十蚊至去補領, 慳得就慳啦, 將損失降到最低呀.

好慘呀! 尋晚跌左個銀包係的士, 到依家都無消息呀! 已經打左去的士聯合報失中心, 又去左報警, 不過都無咩用, 唯有破財擋災, 希望幸運會再次降臨係我身上啦. 補領失物價 (已 06 年 06 月 06 日計算) 智能身份証 - $395 駕駛執照 - $110 公共圖書証 - $25 學校圖書証 - $100 匯豐信用咭 - $0 (用 Cut 咭來豁免 $100) 東亞信用咭 - $0 (自動豁免) Compass Visa 咭 - $0 (自動豁免) 提款咭多張 - $0 (自動豁免) 八達通 - $150 住戶八達通 - $30 住戶証 - $50 宏利醫療咭 - $30 保栢醫療咭 - $0 (第一次豁免) 醫咭 - $未知 (已過期) 覆診咭多張 - 無價 捐血咭 - 無價 一道符 - 無價 + 保平安 証件相多張連相底 - 無價 元綠咭 - 唔值錢

凝凝真的很似我啊!

昨日硬碟突然出現 "碟 入/出 錯誤" (俗稱 Disk I/O Error), 連 OS 都入唔到 (因為就係擺 OS 的硬碟瓜左), 唯有今日去開旺角食飯期間, 係旺電買左隻 Hitachi 160GB / 7200rpm / DMA150 ($490) 硬碟返屋企救機. 點知... 我部六年歷史加勁舊的 Intel P3 800MHz 電腦係認唔到成隻新硬碟的, 低板只係認到 8GB, 好彩 OS 認到 130GB, 不過都好過無, 立刻間左個 40GB 分區, 裝個 OS, 依家終於上到網啦. 諗下諗下, 都係時候買部新機啦, 再見啦... 英特爾奔黱三處理器...

今日帶凝凝去健康院, 做磅重, 度高, 同見姑娘. 凝凝的身高處於同年紀的最高點, 體重同身高就比例正常. 姑娘話唔好比佢睇咁多電視呀, 睇得電睇多, 第二時對其他平面又沒有動作的事物如書本等, 興趣和專注力都會降低, 唔好呀, 我無耐性教妳做功課架 ...

BB打左針兩日, 好眼瞓, 起身一個鐘玩一陣又瞓返, 真係好眼瞓. 昨晚, 重一口氣由十點瞓到今朝七點, 足足瞓左九個鐘. 佢依家最鐘意就係睇電視, 抱住都要睇電視, 睇唔到電視就擰來擰去, 好曳 ...

今晚工人阿詩來了, 懂少許廣東話, 也懂少許英語, 相比下, 比上一個工人好多了. 不過, 將來的事是沒有人知道的, 唯有 ... Hope for the best, plan for the worst ... 這兩個星期, 好彩有姑媽和爺爺來幫手湊曉凝, 我地兩個先可以放心返工, 如果唔係, 一定成日掛住同擔心佢啦. 本來曉凝這個爺爺對湊BB原全唔熟手, 經過兩個星期的連續特訓, 現在對一般的換片, 喂奶和掃風都好在行, 重同孫女建立左好深的感情添.

昨日帶寶寶去下葵涌兒童體能智力測驗中心做聽力測驗, 準時十一點前去到, 首次登記要一百元正, 其後每次覆診要六十元. 等左半個鐘, 就同護士見面啦, 主要係收集資料, 問吓凝凝的家庭背景, 問吓佢的身心發展, 例如有無望住D野, 有無舉起個頭仔, 對突如其來的聲音有無反應等, 跟住就走得啦. 其間, 護士話我抱BB抱得太緊張, 抱得佢唔舒服, 重教我應該點樣抱至正確. 吓吓, 唔怪之得, 我抱親凝凝, 佢都擰來擰去, 又喊 ... 又話聽力測驗, 點解唔駛做聽力測驗, 原來要再排期, 再等四至六個月, 就會按排真正的聽力測驗, 希望佢測驗合格啦.

今日一早要去攞出世紙, 不過瞓晏左, 十點半至起身出門口. 去到油麻地入境處, 嘩! 人山人海, 有大有細, 重寫住" 今日額滿 "兩個字, 唔通真係Full左, 早知一朝早來排隊攞籌啦, 攞唔到出世紙, 點交差呀. 唔理咁多, 一於去詢問處問吓有無辦法同求吓情啦. 點知一問, 原來出世紙唔係呢度攞, 要去大廈背面另外一個門口的生死登記處至有出世紙攞, 二話不說, 我即刻跑去大廈背面的生死登記處, 希望攞到籌啦. 好彩, 生死登記處真係少人好多, 又無"今日額滿"兩個字, 一去到我就攞到72號籌, 依家叫到幾多好籌呢? 嘩! 原來叫到71號, 跟住好快就輪到我, 一切辦妥, 約11:30就搞掂走得.