生活小小日記

璇B今日十一點去油麻地打針（麻疹、流行性腮腺炎、德國麻疹混合疫苗），好少人，好快打完。 之後，去永安百貨買了  0/3 Baby  的「 安全兒童門欄 G22-SG99A 」，要成$639，真貴啊! 不過，可以防止璇B衝入廚房，也是物有所值的。

話咁快，妹妹已經一歳啦! 妹妹行路好叻，可以自己行來行去。最曳係成日衝入廚房同廁所，行得好快。 落床時，識得轉身用腳落地，都幾醒呀! 妹妺好有好奇心，觀察力又強，會學家姐抹鼻水，又會學人用鑰匙開鎖。

今朝十點再去「馮榮太」睇跌打，有開門，醫師幫家姐按左好耐腳，跟住包藥膏，隻右腳要再敷藥八個鐘頭。 診金$180。

今朝九點半即刻帶家姐去睇跌打，可惜「馮榮太」無開，唯有去青怡一樓的中醫藥房睇跌打。 醫師幫家姐托左一下骹位，跟住就無痛啦！不過，依然係腫左同瘀晒，要敷藥膏兩日，每日約八小時。 診金$300。

今日帶家姐去荃灣玩，有一個新開的室內遊樂場，$90蚊全日任玩，有波波池、滑梯、跳彈床等。 本來玩得好開心，點知我同家姐一齊跳彈床時，家姐踩到我的腳趾，就係咁，家姐就扭傷左隻右腳。 開頭以為小小痛，無咩事，又繼續再痛住玩多一個鐘頭。到夜晩先發現成隻右腳腫左，好嚴重! 咁夜無醫生睇，唯有明日先睇跌打。

今年家姐同妹妹都收到好多聖誕禮物呀！

今晚的大餐有壽司、肉醬意粉、雞翼、鵪鶉蛋同腸仔，好好味呀！

今年收到聖誕老人寄來的聖誕咭，好開心呀！

今晚真係好凍，得十一度，但係今晚有月全食， 幾凍都要去睇下啦！今晚唔睇，就要等到2014年10月8日啦。 月全食發生在10時06分，歷時52分鐘，直到10時58分。 食既。 食甚。 生光。

今日，家姐參加左樓下的雪人DIY勞作班，成個雪人都係用長條形的瓦通紙捲成的，真係好難捲，都幾難做。

家姐的新黑鞋，光澤表面，還有心心暗花圖案。 家姐的 UNIQLO 超輕量羽絨褸，又輕又保暖。

一人一花計劃（2011/12） 又開始啦！ 今年係種「秋英」，學名 Cosmos Bipinnatus，又名上海菊，是常見的觀賞花卉。 移盆。在花盆的泥土中挖一個洞，把幼苗移離發芽盤，然後放入洞中。 澆水。移盆完成後，花盆的泥土很乾，要馬上澆水，好讓幼苗吸收水份生長。

妹妹今日十一個月大啦！有四隻牙仔，好鍾意笑，可以自己舉住手係屋企行來行去，最鍾意叫「爸爸」同「媽媽」。 妹妹豬依家行得好穏，最鍾意望下人，然後偷偷地一步一步行入去廚房，令你笑過不停。

十一月二十二日，攜號碼轉台去「 和記電訊 3 」，用左 $98 月費（計落其實係 $101.33），12個月合約，包1400分鐘、350MB、隧道費、SMS免費12個月、送兩張$50屈臣氏優惠劵。 第一次用 3G，原來有流動數據真係好方便，可以隨時隨地上網，令到部 iPhone 變得有用左。 不過，上網速道真係好慢，下載得 0.29Mbps，反而上載就有 0.55Mbps，好奇怪呢！

咩係 Phone x Phone 呀？ 其實係一個放 iPhone 的電話座，上面有一條耳機接線，插入 iPhone，就會變成一部真正的懷舊電話。不過，聽筒太短，好細聲又有回音，實際用途不大。

家姐同曉媽一齊合作的「 敬師運動 」填色創作比賽，在校內得到優異奬，還有一份禮物，好開心呀！ 這是填色創作比賽的圖稿。 這是我們的完成品。

美心西餅 的 Halloween 啫喱杯，個樣好靚，南瓜頭杯重可以留番做影相道具，好實用呢。味道都幾好，不過就貴左少少啦，要成 $16 蚊一杯。 妹妹見到個 Halloween 啫喱杯，唔食得都要摸一下。

第一次去「 香港美酒佳餚巡禮 」，唔係為飲酒，而係為左食。 食左鵝肝、和牛、乳豬飯、芝士、雪糕同牛柳粒，都幾好食。 家姐就淨係食左杯雪糕，妹妹就食左少少芝士，志在參與啦！