生活小小日記

今日帶曉凝去探望太爺爺和叔仔一家，曉凝一見到叔仔就一齊玩湯馬士火車，好好玩呀。 因為太爺爺十一點去左瑪麗醫院覆診，兩點半才回來，所以遲了到酒樓，曉凝今餐食左成碟腸粉（多豉油）同兩個叉燒包（淨係食皮唔食叉燒）。吃飽飽後，三點半便回家了，一上904號巴士，曉凝立即瞓著左，一路瞓到去美孚。 返到屋企重要食個「荷蘭撻」（美心西餅）做茶點添。 今日路經 置地廣場 ，曉凝影左張相，都影得幾好呀。

話說年頭公司聚餐時，每人送左兩張戲飛，今年年尾到期，即係得番兩日就到期，所以今日即刻請左一日假去睇戲啦。已經五年有多無去過戲院睇戲，真係好興奮又緊張呢！ 今日去左東涌 UA 戲院睇「阿凡達」，無錯呀！係全城最紅的「阿凡達」！ 不過，竟然係 35mm 菲林版，亦即係無 3D 的版本。劇情好緊湊，重有傷感同感人情節，個人認為真係幾好睇，如果係 3D 版應該更加好睇。雖然畫面唔高清，動作場面重有少少矇添，不過唔駛錢有戲睇，好滿足啦！ 睇完戲，去左美食廣場食下午茶，食左個三巡海南雞飯，雞油飯好好好味呀！重有一個台灣大腸柯仔麵線，就好難食呢！

吉之島大減價，今日係最後一日，即刻衝去買平野啦！ 買左三對襪俾曉凝，重有 Cinnamon 底衫仔同波鞋仔，特價後再有八折，真係好抵呀！ 曉凝自己揀左粉藍色 Cinnamon 波鞋仔（31號）。

今日同公公婆婆係尖沙咀飲完茶，就同表姐一家去左西九海濱長廊踩單車。 係中港城外邊搭77M小巴去海濱長廊，因為無位，我地上車先，表姐一家就搭左下一架小巴，點知我地架小巴無停海濱長廊個站，直去九龍站，唯有自己行番轉頭去海濱長廊，真係行左一段寃枉路。 曉凝以為表姐唔等佢踩單車，重喊添，唯有抱起曉凝，行快兩步去搵表姐啦。見番表姐，曉凝即刻開心番晒。曉凝揀左一架米妮老鼠小單車，開頭踩得唔係好順，再踩多左一陣，就踩得幾好同好順啦。 曉凝足足踩左一個鐘頭單車，好晒利呀！問佢攰唔攰，曉凝竟然話踩單車唔攰，好神奇呀！ 踩完單車已經三點，再跟表姐同表姐表姐玩多一陣已經四點啦，玩左咁耐，曉凝真係好攰，一上到地鐵就瞓著左啦。 小童單車每小時$25 大人單車每小時$30

又到拆禮物的日子，真係好開心呀！

今日係學校聖誕聯歡會，曉凝準時八點半就返左學校化妝，準備九點半開始的聯歡會。時間尚早，凝爸就去食個豐富早餐先，跟住就去聯歡會啦。 曉凝同自己一班同學仔表演唱歌同跳舞，就係「齊到各地報佳音」，成班K1的小朋友都跳得好落力同好整齊，好好睇呀！睇得出係經過長時間同專人訓練，老師真係好犀利呀！ 曉凝化左妝，好得意呀！ 聯歡會表演完畢後，就去左玩攤位遊戲。曉凝一共玩左四個遊戲，擲豆袋、拋波、砌圖同找圖遊戲，贏左好多禮物，重搵左小丑叔叔扭左兩個汔球手鍊添。

今晚同公公婆婆重有表姐去左青衣城影相，曉凝開頭排隊話唔影，入到去就肯同表姐婆婆一齊影相啦！ 重有擺姿勢添！又肯望鏡頭，好呀！

今年公司旅行唔駛再玩 Team building 啦！變左參加油麻地旅遊的新界一日遊，淨係食同參觀就得啦！ 第一站係挪亞方舟。 第二站係元朗屏山文物徑。午餐係食盤菜。 最後就係恒香製餅工場，買左老婆餅同蛋黃蓮蓉酥做手信。

今個星期有新功課，又係新挑戰，就係曉凝要種「石竹」啦！由細到大我都未種過花，今次都真係第一次。 學校已提供一棵「石竹」幼苗，所以第一件事就係要換盆。屋企都無開種花又點會有盆呢? 琴晚即刻去左旺角「 繽紛園藝店 」買花盆同買泥，由於無睇清楚說明書，結果買左一個6.5吋的花盆，原來學校通告話係要買一個3吋的花盆。無所謂啦！大有大種，小有小種，落多些泥和水，都應該種到花架！ 回家後，將科學泥倒入新盆中，直至到離盆口約兩厘米位置，然後在中間挖一個洞，放入幼苗，再輕輕壓實表面泥土。最後，曉凝親自為盆栽淋水，大功告成。 事後發現．又係無睇說明書之故，原來要係花盆底放一塊防蟲網再落泥架，算數啦！唔好再搞佢啦！再換多次盆，實搞到整斷棵幼苗呀！ 有關活動開支： 6.5吋啡色塑膠花盆一個 $11 科學泥2升 $8 其他資料： 康文署 一人一花計劃 石竹的生長過程 種子 Seeds 幼苗 Seedlings 定植 Potting up 結蕾 Bud formation 開花 Blooming

天氣開始轉涼，曉凝亦都好快要著冬季校服，不過冬季校服裙要配黑色皮鞋（夏天是白色皮鞋），所以今日就同曉凝去左荃灣吉之島買鞋啦。揀左對有少少花紋的黑色皮鞋，30號鞋。 另外，曉凝平時著開的粉紅色公主鞋，個魔術貼已經貼唔實，好容易鬆開，所以又買對新去街鞋啦。曉凝自己揀左對 Cinnamoroll 鞋，又係粉紅色。